Lojërat e fatit, Dogana: Arkëtimet janë rritur në nivelin 19 për qind
Prishtinë – Në periudhën Janar-Shtator 2017 Sektori i Lojërave të Fatit i Doganës së Kosovës ka arritur të arkëtojë gjithsej 10.517.334 € ose 19% më shumë të ardhura krahasuar me të njëjtën periudhë të një viti më parë.
Lajmi është dhënë nga Dogana e Kosovës, ku në këtë kontekst janë iniciuar gjithsej 212 kundërvajtje doganore ose 65% më shumë se në periudhën e njëjtë të vitit 2016.
“Gjithashtu janë arkëtuar gjithsej 153.000 € në vlerën e gjobave dhe dënimeve ose 75% më shumë se në periudhën e njëjtë të vitit 2016. Ndërkohë këtë vit në periudhën raportuese janë sekuestruar 242 aparate dhe 342 pajisje të tjera (shtëpizë kompjuteri, printer, TV etj.) në vlerë prej 383.900€.
Pra ky vit, shënon ngritje në vlerë të mallrave të sekuestruara prej 32% në raport me periudhën e njëjtë të viti paraprak, pika baste të pa licencuara janë identifikuar në 23% më shumë se në vitin paraprak. Veprimet operative në raste të caktuara janë koordinuar edhe me Policinë e Kosovës, Administratën Tatimore dhe sektorë të tjerë në zbatim të ligjit”, thuhet në njoftimin e Doganës së Kosovës.
Statistikat
Disa statistika si në vijim:
- Kundërvajtje doganore tek lojërat e fatit: 212 raste
- Vlera e mallrave të konfiskuara: 383.900€
- Gjoba- dënime: 153.000€
- Aparate të konfiskuara: 242 copë
- Pajisje të tjera të konfiskuara (shtëpiza, printer, TV): 342 copë
- Aktvendim-gjobë për operim basti pa licencë: 128 raste
- Vlera e gjobave: 215.040€
- Veprime të përbashkëta me njësi nga DK dhe agjenci të tjera: 35
- Taksa të arkëtuara: Janar-Shtator 2016 €8.854.449 dhe Janar-Shtator 2017 €10.517.334€
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.