“Luftën me pandeminë mund ta fitojmë në 2022” – Fauci, thirrje amerikanëve që të vaksinohet, përpara stinës së dimrit

Shtetet e Bashkuara të Amerikës mund ta venë Covid-19 nën kontroll vitin e ardhshëm, nëse programi i vaksinimit zgjerohet. Deklarata është bërë nga këshilltari i Shtëpisë së Bardhë, Dr. Anthony Fauci, menjëherë pasi Pfizer mori aprovimin e plotë për vaksinën e saj në SHBA.

Fauci, eksperti më i lartë i sëmundjeve infektive në SHBA, tha në një konferencë për mediat në Shtëpinë e Bardhë se miratimi i plotë i vaksinës së Pfizer-BioNTech nga Administrata e Ushqimeve dhe Barnave hap rrugën që më shumë njerëz të vaksinohen.

Gjithashtu, pritet edhe miratimi i plotë i vaksinës së Moderna në javën e ardhshme. “Dua t’i bëj thirrje njerëzve të pavaksinuar, që të kuptojnë se ne kemi aftësinë për të shkurtuar rrugën e kësaj pandemie”, deklaroi Fauci.

“Mendoj se ka mundësi të arsyeshme që Pfizer apo Moderna të marrin aprovimin nga FDA edhe për përdorimin e vaksinave te fëmijët nën 12 vjeç, përpara sezonit të ardhshëm të festave”, shtoi Fauci. Gjatë konferencës për mediat, Fauci i bëri thirrje edhe kompanive private dhe qeverive lokale dhe shtetërore t’i kërkojnë stafeve të tyre që të vaksinohen, në përpjekje për të rritur normat e vaksinimit.

Fauci shtoi se kujdesi shëndetësor duhet të përdorë më shumë trajtimin me antitrupa kundër Covid-19, përfshirë ato nga Eli Lilly apo GlaxoSmithKline, në mënyrë që të reduktohen shtrimet në spitale dhe vdekjet me më shumë se 85%.

Shtetet e Bashkuara të Amerikës po përballen me një valë tjetër të infektimeve me variantin Delta. Shtrimet në spitale dhe vdekjet po rriten, sidomos në Florida, Mississippi, Louisiana, Texas dhe në vende të tjera në jug të SHBA.

Klevis Llaha/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.