Rreziku nga COVID në Paqësorin Perëndimor – Mbi 6 milionë njerëz në rajon janë infektuar dhe mbi 82.000 kanë vdekur
Rritjet e rasteve me koronavirus, të nxitura pjesërisht nga varianti Delta, po i shtyjnë sistemet shëndetësore të disa vendeve të Paqësorit Perëndimor në mënyrë të rrezikshme pranë një “linje të kuqe”, tha Drejtori Rajonal i Organizatës Botërore të Shëndetësisë, Takeshi Kasai, në një konferencë për mediat. Ajo linjë ekziston aty ku numri i rasteve kritike tejkalon kapacitetin e sistemit të kujdesit intensiv në spitale, shtoi ai.
“Vaksinimi sa më shpejt i kategorive prioritare veçanërisht punonjësve të shëndetësisë dhe njerëzve të moshuar e më pas kategorive të tjera është thelbësore” tha Kasai.
OBSH raportoi se në tre javët e para të gushtit, kishte një rritje të raportuar nga dy përqind në 10 përqind aktualisht të rasteve globale që vinin nga rajoni i Paqësorit Perëndimor. Rajoni përfshin 37 shtete duke filluar nga Australia dhe Zelanda e Re deri në Filipine, Japoni, Kinë dhe Korenë e Jugut.
Mbi gjashtë milionë njerëz në të gjithë rajonin janë infektuar me koronavirus dhe mbi 82,000 kanë vdekur, me Indonezinë, Filipinet dhe Malajzinë që kanë numrin më të madh të rasteve, tha ai.
Rastet me COVID-19 në Sidnej u rritën në një rekord të ri ditor të Mërkurën, ndërsa zyrtarët apelojnë për rritje të vaksinimeve për të ndihmuar në frenimin e shkallës së shtrimeve në spital që po shkakton probleme serioze në sistemin shëndetësor.
Përkundër dy muajve të bllokimeve, shteti i Neë South Ëales raportoi 919 raste të reja në mes të një shpërthimi në rritje të variantit Delta, duke e çuar numrin e rasteve të përditshme të Australisë në afro 1.000. Gjithsej 113 persona në këtë shtet janë në kujdes intensiv, ku 98 prej tyre janë të pavaksinuar.
Ndërkohë, Zelanda e Re regjistroi 62 raste të reja COVID-19 të Mërkurën, duke e çuar numrin e përgjithshëm të rasteve në shpërthimin e fundit në 210.
Dymbëdhjetë nga këto raste ishin në kryeqytetin Wellington, ndërsa pjesa tjetër ishin në qytetin më të madh Auckland. Një pjesë e madhe e rasteve në shpërthim ishin të përkatësisë etnike Samoane.
Ministri i Shëndetësisë Chris Hipkins u bëri thirrje banorëve që të vaksinohen, në mënyrë që të kthehen në jetën e zakonshme që shumë e kishin shijuar për pjesën më të madhe të vitit. Vetëm rreth 26% e 5 milionë shtetasve të Zelandës së Re janë vaksinuar plotësisht.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.