Madridi në gjendje të jashtëzakonshme – Qeveria vendos masat anti-Covid edhe pse Gjykata i refuzoi
Qeveria spanjolle ka shpallur një gjendje të jashtëzakonshme në Madrid dhe rajonin përreth për të luftuar rastet në rritje të koronavirusit.
Kjo vjen ndërsa gjykata e lartë në Madrid të enjten hodhi poshtë masat e detyruara në rajon nga qeveria qendrore, të cilat përfshinin bllokimin e pjesshëm të kryeqytetit spanjoll dhe nëntë komunave fqinje.
Gjykata “refuzoi ratifikimin e masave, sepse ato dëmtojnë të drejtat dhe liritë themelore” të 4.5 milion banorëve të prekur nga bllokimi i pjesshëm. Si rezultat i vendimit, gjobat nuk mund t’u jepen qytetarëve që shkelin rregullat.
Qeveria kombëtare tha të enjten mbrëma vonë se Sánchez kishte folur në telefon me Kryeministren rajonale konservatore të Madridit Isabel Díaz Ayuso dhe i dha asaj një ultimatum. Sánchez thuhet se i tha Ayuso-s se nëse ajo nuk i shtrëngonte shpejt masat ose bënte një kërkesë zyrtare që qeveria e tij kombëtare të shpallte gjendjen e jashtëzakonshme, atëherë qeveria e tij do të shkonte përpara dhe ta deklaronte gjithsesi.
Një gjendje e jashtëzakonshme i jep qeverisë kombëtare kompetenca të jashtëzakonshme në kohë krizash për të kufizuar përkohësisht të drejtat kushtetuese të qytetarëve. Në këtë rast, kjo do të kufizonte lirinë e tyre të lëvizjes duke rifilluar kontrollet rrethuese në Madrid dhe disa qytete afër që gjithashtu vuajnë nga nivele të larta infektimi.
D.B – SCAN
Burimi: Euronews
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.