Mbështetja e bizneseve në Francë, Le Maire: “Do të kushtojë 1.6 mld euro në muaj prej masave të karantinës”

Ministri francez i Financave, Bruno Le Maire, tha se zgjerimi i skemës së kompensimit për bizneset që janë detyruar të mbyllen prej koronavirusit, do të kushtojë 1.6 miliardë euro në muaj.  Në një fjalim përballë kombit, presidenti Emmanuel Macron tha këtë javë se do të nisë zbutjen e masave të karantinës, në mënyrë që dyqanet të mund të rihapen gjatë sezonit të pushimeve.  Megjithatë, restorantet, baret, hotelet dhe palestrat do të qëndrojnë të mbyllura dhe mund të përfitojnë nga një pagesë e përjashtuar nga taksat prej 10,000 euro në muaj, apo 20% e të ardhurave të të njejtës periudhë një vit më parë, brenda një limiti prej 100,000 eurosh.

Le Maire tha se kjo skemë do të zgjasë për sa kohë që janë në fuqi mbylljet e administratës.  “Karantina ndikon 200,000 kompani dhe do t’i kushtojë financave publike 1.6 miliardë euro në muaj”, -tha le Maire. Zyrtarë të ministrisë së Financave kanë bërë të ditur se shpenzimet shtesë do të mbulohen nga një diferencë prej 5 miliardë euro në buxhetin e përditësuar të 2020-s, që u kalua me nxitim në parlament këtë muaj, pasi Franca u fut në karantinë të dytë.  Qeverisë i është dashur të ndryshojë vazhdimisht planet e buxhetit këtë vit, ndërkohë që kostot e lidhura me pandeminë janë fryrë.  Le Maire tha se pret që ekonomia e dytë më e madhe e Eurozonës të rimëkëmbet me 6% në vitin 2021.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.