Mbi 500,000 të vdekur nga Covid në SHBA. Biden mban një minutë heshtje për viktimat. “Të luftojmë së bashku pandeminë”
Presidenti Joe Biden mbajti një minutë heshtje për mbi 500,000 të vdekurit nga Covid-19, dhe i bëri thirrje amerikanëve që të lënë mënjanë ndasitë politike edhe të luftojnë së bashku pandeminë. Biden, Zv/presidentja Kamala Harris, gruaja e parë Jill Biden dhe zotëria i dytë, Doug Emhoff, mbajtën një minute heshtje tek Shtëpia e Bardhë.
‘Sot kemi arritur një shifër të zymtë dhe pikëllyese, prej 500,071 të vdekur. Kanë vdekur më shumë amerikanë se në Luftën e Parë Botërore, Luftën e Dytë dhe Luftën e Vietnamit, së bashku. Janë më shumë jetë të humbura nga virusi se në çdo komb tjetër në botë, por ndërkohë që pranojmë këto vdekje në masë, ne kujtojmë çdo person dhe jetët që kanë jetuar.”
Biden kërkoi gjithashtu që të gjithë flamujt në pronat federale dhe njësitë ushtarake të ulen në gjysmë-shtizë për 5 ditët e ardhshme. Thuajse 19% e vdekjeve totale nga koronavirusi në botë kanë ndodhur në Shtetet e Bashkuara, një shifër tejet e madhe duke marrë parasysh se vendi zë vetëm 4% të popullsisë botërore. Kjo reflekton mungesën e një reagimi kombëtar të unifikuar në vitin e kaluar, kur administrata e ish-presidentit Donald Trump, i la shteteve të marrin vendimet e veta për të trajtuar krizën më të madhe të shëndetit publik në një shekull. Demokrati Biden mori detyrën më 20 janar, pasi mposhti republikanin Trump, në zgjedhjet e vitit 2020, duke argumentuar se do të bëjë punë më të mirë për të trajtuar pandeminë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.