Mbrojtja e patentës së vaksinave / SHBA heq dorë. Fitore për vendet e varfëra, humbje për farmaceutikën

Presidenti Joe Biden tha se mbështet heqjen dorë nga të drejtat e pronës intelektuale për vaksinat e Covid-19, duke u përulur ndaj presioneve të politikanëve demokratë dhe mbi 100 vende të tjera, por duke irrituar kompanitë e farmaceutikës.  Kjo përbën një ndryshim të theksuar të pozitës së mëparshme të Shteteve të Bashkuara. “Kjo është një krizë shëndetësore globale dhe rrethanat e jashtëzakonshme të pandemisë kërkojnë masa të jashtëzakonshme”- tha Katherine Tai, negociatorja më e lartë tregtare, përballë rritjes së shqetësimeve mbi situatën në Indi, që mund të sjellë përhapjen e varianteve më të forta të virusit.  Aksionet e prodhuesve të vaksinave, përfshirë Moderna dhe Novavax ranë me disa pikë përqindjeje, ndërsa Pfizer humbi vetëm pak.   “Ky është një moment madhështor në luftën kundër Covid-19”- shkroi në Twitter kreu i Organizatës Botërore të Shëndetësisë, Tedros Adhanom Ghebreyesus, që shtoi se kjo reflekton lidershipin moral të Shteteve të Bashkuara.  Kompanitë e farmaceutikës që po punojnë për vaksinat, kanë raportuar rritje të madhe të të ardhurave gjatë krizës. Grupi më i madh i lobimit i industrisë paralajmëroi se vendimi i Biden do të përkeqësojë kundërpërgjigjen e kompanive ndaj pandemisë.   Biden ka qenë nën presion për të ndarë furnizimet e vaksinës dhe teknologjinë për të luftuar virusin.  SHBA dhe  disa vende të tjera bllokuan më parë negociatat tek Organizata Botërore e Tregtisë mbi propozimin e drejtuar nga India dhe Afrika e Jugut, për të hequr dorë nga mbrojtja e disa patentave, për të nxitur prodhimin e vaksinave në vendet në zhvillim. Kritikët e këtij vendimi thonë se prodhimi i vaksinave është kompleks dhe caktimi i fabrikave të reja do të ridrejtojë burimet nga njësitë ekzistuese të prodhimit.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.