Mocioni i së shtunes/ Pikëpyetja në median e Kosovës: A do të jetë qeveria Kurti më jetëshkurtëra në historinë e qeverive?
Lidhja Demokratike e Kosovës ka nisur mocionin e mosbesimit ndaj qeverisë së drejtuar nga Albin Kurti pjesë e së cilës është edhe vetë dhe kjo pritet të ndodhë në seancën e cila është raportuar se do të mbahet të shtunën.
Për mocionin e mosbesimit ndaj Kurtit, LDK ka mbështetjen e Aleancës për Ardhmërinë e Kosovës, Nismës Socialdemokrate, Aleancës Kosova e Re dhe të minoriteteve, por nuk do t’i ketë votat e së paku 4 deputetëve të saj.
Mocioni i mosbesimit ndaj Kurtit nga Lidhja Demokratike e Kosovës ka ardhur si vendim pas shkarkimit të ministrit të Punëve të Brendshme Agim Veliu nga kryeministri i Kosovës, Albin Kurti.
Kreu i Lidhjes Demokratike të Kosovës, Isa Mustafa veç arsyes së shkarkimit të Veliut tha gjithashtu se edhe prishja e raporteve me SHBA-të dhe sanksionet e SHBA-ve e kanë shtyrë partinë e tij në një vendim të tillë.
Në anën tjetër, Partia Demokratike e Kosovës ende nuk ka marrë vendim sa i përket mocionit të LDK-së.
Por, nëse mocioni i mosbesimit i nisur nga Lidhja Demokratike e Kosovës do të votohet në Kuvend, qeveria e Kurtit do të jetë më jetëshkurta në historinë e qeverive në Kosovë dhe Albin Kurti do të jetë kryeministri me mandatin më të shkurtër ndonjëherë në Kosovë.
E në anën tjetër, qeveria Kurti hyn në mesin e qeverive të cilat kanë marrë më së shumti kohë për t’u formuar jo vetëm në Kosovë, por edhe në Evropë.
“Qeveritë e kaluara të Kosovës, llogaritur me mesataren e kohëzgjatjes së qeverive në Evropën Perëndimore e që është 636,7 ditë më e gjata dhe mesatarja më e shkurtër prej 582.5 ditë, atëherë kohëzgjatja mesatare e qeverive të Kosovës është 1,178 ditë. Por, në anën tjetër, kryeministri Kurti në qoftë se qeveria e tij do të rrëzohet të shtunën, atëherë del të jetë qeveria më jetëshkurtër në historinë e qeverive në Kosovë me vetëm 45 ditë në pushtet” shkruan RTK.
Artikulli i plotë: https://www.rtklive.com/sq/news-single.php?ID=420183
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.