Moderna, kontaminimi nga grimca metalike – Vaksina pezullohet në Japoni. Nisin hetimet nga rregullatorët në disa vende
Kontaminimi i i gjetur në një seri vaksinash të Moderna të dorëzuara në Japoni besohet të jetë një grimcë metalike, raportoi transmetuesi publik japonez NHK, duke cituar burime në Ministrinë e Shëndetësisë. Japonia pezulloi përdorimin e 1.63 milionë dozave të dërguara në 863 qendra vaksinimi në të gjithë vendin, më shumë se një javë pasi shpërndarësi vendas, Takeda Pharmaceutical, mori raporte për ndotës në disa doza.
Raporti i NHK, citoi burimet e ministrisë duke thënë se grimca reagonte ndaj magneteve dhe për këtë arsye dyshohej se ishte një metal. Moderna e ka përshkruar atë si “lëndë grimcash” që nuk ndikonte në sigurinë, ose efikasitetin e vaksinës. Një zyrtar në Ministrinë e Shëndetësisë tha se identiteti i ndotësit ende nuk është konfirmuar. Zhvillimet e fundit mund të përbëjnë një pengesë të re për vaksinimin e Japonisë, pasi qeveria po përpiqet të bindë shumë qytetarë, veçanërisht të rinjtë, që të vaksinohen.
Të Premten, tetë prefektura të tjera hynë në gjendje të jashtëzakonshme, duke sjellë një total prej rreth 80% të popullsisë së Japonisë nën kufizime të lidhura me COVID-19. Qeveria raportoi gati 25,000 infeksione të reja dhe raste të rënda në një rekord prej 2,000 për të enjten. Ministria ka deklaruar se pezullimi i dozave të Moderna ishte një masë paraprake, por masa bëri që disa kompani japoneze të anulojnë vaksinimet e punëtorëve dhe rregullatori europian i barnave të fillojë një hetim.
Kompania farmaceutike spanjolle Rovi, e cila merret me dërgimin e vaksinave Moderna për tregje të ndryshme, tha se kontaminimi mund të jetë për shkak të një problemi në një linjë prodhimi dhe se po kryet një hetim.
Një zyrtar i Ministrisë së Shëndetësisë tha se do të duhej “pak kohë” për të konfirmuar se sa doza nga grupi i kontaminuar ishin administruar tashmë në Japoni. Kyodo News raportoi se të paktën 176,000 doza janë përdorur bazuar në shifrat e raportuara nga bashkitë.
Deri më tani, rreth 54% e popullsisë së Japonisë ka marrë të paktën një doze.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.