Nafta “shpërfill” rezervat e SHBA – Çmimet vazhdojnë rritjen. Vëmendja kthehet tek reagimi i OPEC+
Nafta është rritur në tregtinë e së Mërkurës, duke vazhduar rritjen e ditës së mëparshme, ndërkohë që investitorët ishin skeptik mbi efektshmërinë e nxjerrjes së naftës nga rezervat strategjike në SHBA dhe u përqendruan tek hapat e radhës nga prodhuesit. Nafta Brent u rrit me 0.2% në 82.44 dollarë për fuçi, pasi u rrit me 3.3% ditën e Martë. Nafta Bruto amerikane (WTI) u rrit me 0.3% në 78.7 dollarë për fuçi, pas një rritjeje me 2.3% në ditën e mëparshme.
Analistët thonë se investitorët ishin të zhgënjyer nga sasia e vogël e rezervave të nxjerra në treg nga SHBA dhe vende të tjera, ndërkohë që veprimet e koordinuara ngritën shqetësime se OPEC mund të ngadalësojë rritjen e prodhimit, duke rimarrë vëmendjen. Shtetet e Bashkuara deklaruan ditën e Martë se do nxjerrin në treg milionë fuçi naftë nga rezervat strategjike në bashkëpunim me Kinën, Indinë, Korenë e Jugut, Japoninë dhe Britaninë, për të zbutur çmimet.
Analistët thonë se efektet në çmime nga kjo lëvizje pritet të jenë afat-shkurtra përballë rimëkëmbjes së fortë botërore nga pandemia. Vendimi për Rezervat mund të shtojë rreth 70-80 milionë fuçi, poshtë 100 milionë plus fuçi që priste tregu, sipas Goldman Sachs. E gjithë vëmendja tashmë qëndron te Organizata e Vendeve Eksportuese e Naftës, së bashku me aleatë si Rusia, që njihen si OPEC+, mbi mënyrën se si do të reagojë ndaj kësaj lëvizjeje nga aleatët, kur të takohen më datë 2 Dhjetor. Emiratet e Bashkuara Arabe deklaruan se nuk bën sens që vendi të shtojë ofertën kur të gjithë treguesit sugjerojnë një sufiçit në tremujorin e parë të vitit të ardhshëm.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.