Nafta vijon rritjen – Ndikon rënia e furnizimit nga Kanadaja dhe Libia 

Çmimet e naftës po qendrojnë në rritje edhe në sesionin e sotëm dhe vijojnë të mbështeten nga çrregullimi në furnizim nga Kanadaja, nga rënia e rezervave në SHBA dhe paqartësitë për eksportet në Libi. Çmimet po mbështeten edhe nga deklaratat e zyrtarëve amerikanë se nuk do të blejnë më naftë nga Irani, duke filluar nga muaji nëntor. Nafta Brent e Londrës po tregtohet në rreth 76.6 dollarë për fuçi, ndërsa nafta Bruto amerikane po tregtohet në rreth 70.7 dollarë për fuçi.

Një ndërprerje e furnizimit në Kanada ka bërë që tregut ti mungojnë rreth 350,000 fuçi në ditë, ndërsa riparimet parashikohet të zgjasin deri në Korrik. Rënia e eksporteve kanadeze ka ndihmuar në rënien e furnizimit në të gjithë Amerikën e Veriut dhe ka ndikuar edhe në rënien e rezervave të naftës në SHBA. Instituti Amerikan i Naftës raportoi një rënie prej 9.2 milionë fuçi të rezervave, gjatë javës që u mbyll më 22 qershor, në totalin e 421.4 milionë fuçive. Analistët e anketuar nga Reuters parashikonin një rënie të rezervave me 2.6 milionë fuçi.

Në Libi, ndërkohë, një luftë pushteti mes qeverisë dhe rebelëve e ka bërë të paqartë se si do të jetë e ardhmja e eksporteve. Gjithashtu, edhe e ardhmja e eksporteve të naftës nga Irani është e paqartë. Shtetet e Bashkuara të Amerikës i kanë bërë thirrje të gjitha vendeve të ndalojnë importet e naftës nga Irani, duke filluar prej muaji nëntor, pasi administrata Trump vendosi sanksione ndaj Republikës Islamike.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.