Nafta zgjeron fitimet – Tregtohet në nivelin më të lartë në 2 muaj
Çmimet e naftës po qendrojnë në rritje në sesionin e parë të kësaj jave, duke prekur njëkohësisht nivelin më të lartë në 2 muajt e fundit. Çmimet po mbështeten nga marrëveshja e OPEC dhe Rusisë për të ulur prodhimin dhe nga sanksionet e SHBA ndaj naftës së Venezuelës. Megjithatë, humbjet po kufizohen nga dobësimi i kërkesës. Organizata e Vendeve Eksportuese të Naftës dhe aleatët filluar uljen e prodhimit në janar, që ka ofruar një mbështetje për çmimet, gjatë kësaj periudhe.
Nafta Brent e Londrës po tregtohet në rreth 63.6 dollarë për fuçi, niveli më i lartë që nga 7 dhjetori i vitit të kaluar. Nafta Bruto amerikane po tregtohet në rreth 55.7 dollarë për fuçi, niveli më i lartë për këtë vit. Furnizimi i tregut nga OPEC ra gjatë janarit, me hapin më të shpejtë në 2 vitet e fundit. Por, ndërkohë që OPEC dhe aleatët po ulin furnizimin, në Shtetet e Bashkuara të Amerikës prodhimi po qendron në nivele rekord.
Megjithatë, të dhënat e publikuara treguan një rënie të numrit të puseve aktive, gjatë javës së kaluar, në nivelin më të ulët në 8 muajt e fundit, duke ofruar një mbështetje për çmimet. Por, sipas analistëve, shqetësimi kryesor është lufta tregtare SHBA-Kinë, që mund të ngadalësojë më tej ekonominë globale, dhe për rrjedhojë kërkesën për naftë. Presidenti amerikan, Donald Trump, tha javën e kaluar se do të takohet së shpejti me homologun e tij kinez, Xi Jinping, në përpjekje për të arritur një marrëveshje mbi tregtinë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.