Nafta zgjeron fitimet – Tregtohet në nivelin më të lartë që nga nëntori 2018

Nafta po qëndron në rritje edhe në sesionin e sotëm, duke zgjeruar fitimet e një dite më parë, pasi Uashingtoni njoftoi se synon të zeroje eksportet e naftës nga Irani, duke ushtruar presion mbi importuesit që të mos blejnë naftë nga Teherani zyrtar.

Në anën tjetër, vende si Arabia Saudite kanë siguruar se do të plotësojnë mungesën e shkaktuar në treg nga Irani. Nafta Brent e Londrës po tregtohet në rreth 74.6 dollarë për fuçi, ndërsa nafta Bruto amerikane po tregtohet në rreth 66.1 dollarë për fuçi. Të hënën Shtetet e Bashkuara i kërkuan blerësve të naftës iraniane, se duke filluar nga 1 maji të mos blejnë më, përndryshe do të përballen me sanksione. Përpara vendosjes së sanksioneve vitin e kaluar, Irani ishte prodhuesi i katërt më i madh i OPEC, me rreth 3 milionë fuçi në ditë. Por, në prill të këtij viti, eksportet e këtij vendi ranë poshtë 1 milionë fuçive në ditë.

Presidenti amerikan, Donald Trump është besimplotë se Arabia Saudite dhe Emiratet e Bashkuara Arabe do të plotësojnë mungesën e shkaktuar në tregun e naftës. Arabia Saudite është eksportuesi më i madh i naftës në botë dhe de facto lider i OPEC. Grupi do të takohet sërish në muajin qershor për të përcaktuar politikat e prodhimit për gjysmën e dytë të vitit. Banka Barclays, ndërkohë, deklaroi në një shënim për klientët e saj se, vendimi i Shteteve të Bashkuara do të tkurrë më tej tregun e naftës, që mund të përkthehet në çmime më të larta.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.