Ndalimi i makinave me naftë – Gjykata në Gjermani vendos që Frankfurti të ndalojë makinat e vjetra
Frankfurti duhet të ndalojë makinat e vjetra me naftë nga qendra e qytetit duke nisur nga muaji Shkurt i vitit që vjen, për të përmirësuar cilësinë e ajrit, sipas gjykatës administrative të vendit. Vendimi nga gjykata në Wiesbaden mbi rastin e sjellë nga grupi i mbrojtjes së mjedisit Deutsche Umwelthilfe, erdhi pas vendimit të bujshëm nga gjykata e lartë administrative e Gjermanisë në Shkurt 2018, që i dha dritën e gjelbër ndalimeve brenda në qytete.
Kjo do të ndikojë thuajse 25% e makinave të regjistruara në Frankfurt dhe shumë shoferë brenda qytetit. Sipas Deutsche Umwelthilfe, vendimi do të nxisë zhvendosjen te makinat elektrike. Qeveria rajonale e Hessen-it, i bëri thirrje Berlinit që të përshpejtojë rinovimin e teknologjisë në makinat e vjetra, gjë të cilën industria e makinave ka kundërshtuar për shkak se do të kushtojë miliarda euro.
Merkel ka thënë se do të bëjë gjithçka për të shmangur ndalimin, por është përballur me mosmarrëveshje në koalicionin e saj mbi mënyrën se si do të trajtohet problemi i makinave me naftë me ndotje të lartë. Vendimi i gjykatës vjen 1 ditë pas prezantimit të Mercedesit të parë elektrik, që nisi seriozisht garën e gjermanëve në këtë treg.
Gjykata vendosi që Frankfurti të ndalojë deri në muajin Shkurt, makinat me naftë që i përkasin standardit të emetimit Euro-4 dhe makinat me benzinë në standardet Euro-1 dhe 2, ndërsa makinat me naftë Euro-5, duhet të ndalohen nga Shtatori i ardhshëm. Sipas analistëve, ndalimi i makinave me naftë përbën mënyrën e vetme për Frankfurtin që të përputhet me rregullat, ku ndotja e dioksidit të azotit nuk duhet të kalojë 40 mikrogramë për metër kub ajër në mesatare.
Hamburgu bllokoi këtë vit modelet që dështojnë të arrijnë standardet e fundit të emetimit Euro-6, në rrugë të caktuara. Qytete të tjera si Duesseldorf dhe Stuttgart, ku janë vendosur firma si Dailmer dhe Porsche, po konsiderojnë gjithashtu ndalimin e makinave.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.