BE nxit makinat elektrike – Shqetësohet se po mbetet pas në këtë industri, cakton objektiva të ashpra
Prodhimi i makinave elektrike në Bashkimin Europian, mori një nxitje ditën e Mërkurë, ndërkohë që rregullatorët e unionit vepruan për të mbyllur boshllëkun teknologjik me Kinën, duke ashpërsuar kërkesat për emetimet e gazrave ndotës për prodhuesit. Komisioni Europian propozoi një reduktim me 30% të shkarkimeve të dioksidit të karbonit nga makinat, deri në vitin 2030, si dhe një reduktim me 15% deri në 2025-ën, për të siguruar që prodhuesit do të nisin tranzicionin.
Plani, që do të ulë ndjeshëm limitet aktuale, përfshin incentiva për prodhuesit që t’i japin prioritet makinave elektrike. Komisioni Europian po përpiqet të stimulojë industrinë europiane që të zhvillojë makinat elektrike, pasi shqetësohet se po mbetet pas Kinës, Japonisë dhe Shteteve të Bashkuara. “Makinat janë shpikur në Europë dhe mendoj se do të rishpiken këtu”, tha Maros Sefcovic, Zv/presidenti i Komisionit Europian për Unionin e Energjisë, duke përmendur makinat elektrike kineze në firmat e taksive në Bruksel.
Nëse zbulohet thyerje e rregullave, prodhuesit do të përballen me miliona euro gjoba, me penalltitë që nisin në 95 euro për çdo gram të dyoksidit të karbonit sipër limitit. Kompanitë e quajtën këtë masë tejet ambicioze. Ministri i Jashtëm gjerman, Sigmar Gabriel tha gjatë kësaj jave se është kundër ashpërsimit të objektivave të emetimit deri në 2025-ën, duke argumentuar se rregullat më strikte do të ndikojnë në punësim dhe rritje ekonomike.
Komisionieri për Klimën i Bashkimit Europian Miguel Arias Canete, tha se propozimi përfshin gjithashtu një mbështetje financiare prej 800 milionë euro për zhvillimin e infrastrukturës të karikimit të makinave elektrike.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.