Objektet e rëndësisë së veçantë- ”Siguria jo më nga Forcat e Rendit por nga Policia Ushtarake me 300 efektivë shtesë”

Siguria e reparteve në zona të largëta nuk do të garantohet më nga forcat e rendit, por nga policia ushtarake.  Për këtë qëllim Qeveria po ndërmerr disa ndryshime në ‘Ligjin për Policinë Ushtarake’, të cilat aktualisht janë në fazën e konsultimit publik. Drafti parashikon shtimin e kompetencave të Policisë Ushtarake, të cilat për këto zona do të jenë të njëjta me ato që aktualisht kanë forcat e rendit.

Zakonisht këto reparte, baza dhe objekte të rëndësisë së veçantë gjenden në zona rurale, theksohet në relacionin shoqërues të projektligjit, në të cilat rendi dhe siguria janë të vështira për tu garantuar vetëm nga Policia e Shtetit. Për këtë arsye, duke i shtuar kompetencat Policisë Ushtarake që me veprime proaktive të garantojë rendin dhe sigurinë jo vetëm brenda rrethimit të bazës, por edhe në zonën përreth, rritet në mënyrë të konsiderueshme siguria e vetë bazave dhe reparteve por edhe situata e përgjithshme e sigurisë në shkallë vendi, duke rritur garancinë e kontrollit shtetëror të territorit dhe të luftës kundër krimit të organizuar dhe trafiqeve të ndryshme të cilat janë kryefjala në kohët e sotme.

Efektet e pritshme janë disa, theksohet në relacion:

E para është rritja e numrit të efektivëve të Policisë Ushtarake nga 200 punonjës në 500 punonjës. Gjithashtu, do të ristrukturohen edhe njësitë ekzistuese të FA-së për të vendosur efektivët e rinj nëpër zonat ku do të ushtrojnë aktivitetin e tyre në zbatim të misionit.

Lorenc Rabeta/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.