Dhuna me armë në SHBA -Trump: ”Të sëmurët mendorë janë të përgjegjshëm. Do ashpërsohen kontrollet”
Presidenti i Shteteve të Bashkuara, Donald Trump, tha se do mbështesë kontrollet e ashpra për blerësit e armëve, por shtoi se të sëmurët mendorë janë të përgjegjshëm për të shtënat e fundit dhe se Shtetet e Bashkuara duhet të ndërtojnë më shumë institucione të shëndetit mendor. Gjatë një fjalimi në New Hampshire, Trump tha se është e rëndësishme që të ndërtohen institucione të reja për të sëmurët mendorë dhe në të njejtën kohë të mbrohet amendamenti i dytë.
Do konsiderojnë ndërtimin e institucioneve të reja për ata që kanë nevojë dhe do heqim njerëzit e rrezikshëm e të sëmurët mendorë nga rrugët. Megjithatë, nuk mund ta vështirësojmë situatën për qytetarët që zbatojnë ligjin. Ne do mbështesim gjithnjë të drejtën e vetëmbrojtjes.
Trump ndodhet nën presion për të frenuar dhunën nëpërmjet armëve, pas ndodhive në Ohio dhe Texas që lanë të vrarë dhjetëra njerëz. Presidenti kritikoi gjithashtu demokratët, përfshirë Hilary Clinton dhe ata që po kandidojnë për zgjedhjet e vitit 2020. Sipas tij, një votë për demokratët është një votë për rritjen e socializmit radikal dhe shkatërrimit të ëndrrës amerikane.
“Pavarësisht nëse më urreni apo doni, ju duhet të votoni për mua”, tha Trump.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.