OBSH, thirrje vendeve që të mbështesin Covax: “Shpërndarja e vaksinave, një çekuilibër tronditës”

Në një konferencë për mediat në Gjenevë, Drejtori i Përgjithshëm i OBSH-së Tedros Adhanom Ghebreyesus vuri në dukje se OBSH u kishte bërë thirrje të gjitha vendeve që të fillonin vaksinimet brenda 100 ditëve të para të vitit. Mirëpo edhe pse 100 ditshi është thuajse në përfundim, 194 nga 220 vende kanë filluar vaksinimin, dhe 26 prej tyre nuk e kanë filluar, tha ai. Marrëveshjet bilaterale për të shpërndarë vaksinat COVID-19 rrezikojnë të ndezin flakët e pabarazisë së vaksinave, tha shefi i OBSH-së i cili theksoi se kjo është një kohë për partneritet, jo për patronazh.

“Mbetet një çekuilibër tronditës në shpërndarjen globale të vaksinave. Më shumë se 700 milion doza vaksinash janë administruar globalisht, por mbi 87 përqind kanë shkuar në vendet me të ardhura të larta ose me të ardhura të mesme, ndërsa vendet me të ardhura të ulëta kanë marrë vetëm 0.2% të dozave. Mesatarisht në vendet me të ardhura të larta, pothuajse një në katër persona ka marrë një vaksinë. Në vendet me të ardhura të ulëta, është një në më shumë se 500 persona. Më lejoni ta përsëris atë: një në katër kundrejt një në 500, “tha Tedros. Afrika përbën më pak se 2 përqind të vaksinave të administruara në nivel global deri më tani.

Megjithëse është bërë përparim, shumë vende afrikane mezi kanë lëvizur përtej vijës fillestare, tha Matshidiso Moeti, drejtori rajonal i OBSH-së për Afrikën, në një deklaratë të tijën në Naerobi.

Matshidiso Moeti tha se qasja e kufizuar në vaksina mund të prishë përpjekjet për të përmbajtur pandeminë në kontinent mes kërcënimeve të paraqitura nga një valë e tretë e infeksioneve. Statistikat e OBSH tregojnë se 45 vende afrikane kanë marrë vaksina COVID-19, 43 kanë filluar inokulimin e grupeve me rrezik të lartë ndërsa gati 13 milion nga 31.6 milion doza të dorëzuara deri më tani janë administruar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.