PAK, miratohet shërbimi i ri social i asistencës shtëpiake – Lehtësohen edhe procedurat për përfitimin e pagesës së aftësisë së kufizuar

Ministrja e Shëndetësisë dhe Mbrojtjes Sociale, Ogerta Manastirliu, ka miratuar dy vendime që prekin personat me aftësi të kufizuar.

I pari ka të bëjë me vendosjen e standardeve të shërbimit të përkujdesjes shoqërore dhe asistencës shtëpiake, ndërsa i dyti ndryshon formularët që duhen plotësuar për përfitimin e pagesës së aftësisë së kufizuar, çka supozohet të lehtësojë ndjeshëm këtë procedurë.

Standardet e reja pritet të rrisin numrin e personave që marrin shërbime, duke përmirësuar njëkohësisht pjesëmarrjen e tyre në jetën e komunitetit.

Më i rëndësishmi në këtë aspekt konsiderohet vendosja e shërbimit të ri të asistencës shtëpiake, i cili do të ofrohet për ata persona që e kanë të pamundur të kujdesen për veten dhe nuk mund të ndihmohen nga familjarët. Ky shërbim do të përfshijë:

• Përmbushjen e nevojave të përditshme, sipas vlerësimit, rast pas rasti
• Furnizimin dhe shpërndarjen e  ushqimeve të gatshme në shtëpi
• Furnizimin e barnave apo furnizime të tjera jetike
• Shërbime bazë mjekësore dhe  infermieristike
• Mbajtjen e higjienës personale
• Shërbime rehabilitimi, zhvillimi, këshillimi psikologjik e ligjor sipas rastit

Ofrimi i këtij shërbimi do të realizohet vetëm nga figura profesionale të  certifikuara, si punonjës  socialë, psikologë, infermierë, etj. Paketa e re e standardeve vendos rregulla dhe kritere për cilësinë e shërbimeve, të cilat janë të detyrueshme  për  zbatim  nga  të  gjithë  ofruesit  e shërbimeve, si nga  institucionet publike, nga shërbimet e ngritura nga organizatat jofitimprurëse dhe nga ofrues të tjerë privatë.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.