Panariti reagon ndaj deklaratave të Ramës – Shteti t’u blejë prodhimin fermerëve, jo të importojë nga jashtë

Ish-ministri i Bujqësisë, Edmond Panariti, ka reaguar ndaj deklaratave të kryeministrit Rama në takimin me studentët e Universitetit Bujqësor. Rama mori shembullin e fermerëve në zonën e Korçës, të cilët kultivojnë patate, si një rast i moszbatimit të politikave shtetërore në bujqësi.

Sipas kryeministrit, këta fermerë nuk duhet të ankohen për mosshitjen për shkak se patatja e bardhë është më pak e preferuar dhe del në një kohë kur ka konkurrencë në treg. Rama tha se në vend që t’i ankohen shtetit dhe t’i kërkojnë t’u blejë prodhimin, fermerët duhet t’i drejtohen mbjelljes së pemëve frutore.

Por deputeti i LSI, nuk është i këtij mendimi. Përmes një statusi në rrjetin social Facebook, Panariti shprehet se qeveria mund dhe duhet t’u blejë patatet fermerëve.

“Në vend të tenderave për furnizim me patate importi të spitaleve, ushtrisë, qendrave sociale, mencave, le t’u blejë atyre për këtë qëllim pa hezitim prodhimin e tyre vendas. A e bën dot? Kështu ajo tregon dhembshuri për prodhuesit vendas dhe balancon sadopak presionin asfiksues dhe diskriminues te importeve. Kjo po do të ishte politike mbështetëse nxitëse dhe patriote”, shkruan Panariti.

Ish-ministri i Bujqësisë shprehet se pamundësia për të shitur këtë produkt, lidhet me barrierat që hasen për ta eksportuar jashtë vendit.

“Për fat të keq patatja dhe jo vetëm ajo, lëviz vetëm në një drejtim, nga jashtë brenda dhe a e dini pse? Sepse patatja jonë edhe pse shumë cilësore nuk certifikohet. Nuk certifikohet edhe ngaqë shërbimi i mbrojtjes së bimëve tashmë rudimentar do të kthehet në inekzistent me shkrirjen e Drejtorive të Bujqësisë. Nuk licencohet sepse në nivel qendror ky shërbim është në vdekje klinike”, shton Panariti.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.