Papunësia në Eurozonë – Shënon 9.3% për muajin Maj, niveli më i ulët që prej vitit 2009
Norma e papunësisë në Eurozonë qëndroi në 9.3% në muajin Maj, që është niveli më i ulët që prej vitit 2009, ndërkohë që numri i personave të regjistruar si të papunë ra me 5,000 njësi gjatë muajit.
Sipas zyrës së statistikave të Bashkimit Europian, 15.034 milionë burra dhe gra janë regjistruar të papunë në Eurozonë në muajin Maj.
Megjithatë, Eurozona ka krijuar vende pune me një ritëm mbresëlënës këtë vit, duke e ulur papunësinë nga 10.2% që qëndronte në të njëjtën periudhë një vit më parë.
Kjo rënie ka nxitur shpenzimet konsumatore në rajon, që ka qenë kontribuuesi kryesor në rritjen me 0.6% të ekonomisë në tremujorin e parë.
Ndër vendet anëtare, norma më e ulët e papunësisë për muajin Maj 2017 u regjistrua në Republikën Çeke, me 3%, ndjekur nga Gjermania dhe Malta me 3.9% dhe 4.1% në mënyrë respektive.
Norma më e lartë e papunësisë mbetet në Greqi, me 22.5%, ndjekur nga Spanja dhe Italia me 17.7 dhe 11.3%.
Norma e papunësisë për të rinjtë në Eurozonë rezultoi në 18.9%, me 2.62 milionë të regjistruar si të papunë.
Pavarësisht të fuqizimit të tregut të punës, Banka Qendrore Europiane po kërkon ende për shenja të rritjes më të shpejtë të pagave përpara se të nisë cikin e normalizimit të politikave monetare.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.