Pas 11 vjetësh Gjermania do të nis sërish regjistrimin e popullsisë!
Regjistrimi i popullsisë, i shtyrë për shkak të pandemisë, do të realizohet nga mesi i majit 2022, sipas Zyrës Federale të Statistikave.
Në Gjermani do të bëhet vitin e ardhshëm një regjistrim i ri i popullatës pas njëmbëdhjetë vjetësh pasi shumë të dhëna duhet të përditësohen si për shembull numri i banorëve, aktiviteti i tyre profesional dhe adresa e tyre e banimit. Kryesisht do të përdoren të dhëna ekzistuese administrative, por janë planifikuar edhe anketa, njoftoi Zyra Federale e Statistikave. Regjistrimi do të përcaktojë “sa njerëz jetojnë në Gjermani dhe si jetojnë e punojnë”.
Data e caktuar për nisjen e procesit është data 15 maj dhe nga kjo datë, 10.2 milionë qytetarë të zgjedhur rastësisht do të pyeten, veçanërisht për shkollimin dhe situatën e tyre profesionale, shpjegoi institucioni. Rreth 23 milionë pronarë duhet të japin informacion për apartamentet dhe ndërtesat e tyre të banimit dhe veç tyre do të numërohen edhe banorët e konvikteve dhe banesave kolektive.
Vetëm një pjesë e pyetjeve do të marrin përgjigje në intervista të shkurtra personale, shumica e përgjigjeve mund të jepen online. Regjistrimi i popullsisë bëhet çdo dhjetë vjet, ai duhet të bëhej sipas radhës në vitin 2021 – por data u shty për shkak të pandemisë. Në vitin 2011, Gjermania mori pjesë për herë të parë në një regjistrim mbarë europian. Në atë kohë, doli në pah se shumë qytete dhe komuna kishin më pak banorë se pritej.
Kërkesat për mbrojtjen e të dhënave respektohen dhe ato nuk do t’u transmetohen autoriteteve përveç statistikave zyrtare. Zyra federale tha se kostoja totale ndoshta do të arrijë në 1.5 miliardë euro. DW
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.