Procesit të Brexit po i mbaron koha. Paralajmërojnë të dyja palët, java do jetë vendimtare për negociatat
Britania dhe Bashkimi Europian kanë paralajmëruar në nisje të Javës se po mbaron koha për një marrëveshje të Brexit, ndërkohë që negociatorët ndodhen ende në konflikte mbi ndihmat shtetërore dhe peshkimin. Mbretëria e Bashkuar del nga orbita e Bashkimit Europian më 31 Dhjetor, kur të përfundojë periudha e tranzicionit dhe të dyja palët po negociojnë për një marrëveshje që do të drejtojë thuajse 1 trilionë dollarë shkëmbime tregtare.
Kryeministri Boris Johnson, që po përballet me normën më të lartë të vdekjeve nga Covid-19 në Europë në vendin e tij, ka thënë se marrëveshja është e preferuar, por Britania mund t’ia dalë edhe pa një të tillë. “Po na mbaron koha, kjo është java vendimtare”- tha Sekretari i Mjedisit, George Eustice, duke shtuar se nëse ka progres, mund të zgjaten negociatat.
Bashkimi Europian dha një mesazh të ngjashëm. Pasi janë kaluar të gjithë afatet e vendosura nga të dyja palët, negociatorët ndodhen ende në konflikt për 3 çështje kryesore; peshkimin, ndihmat shtetërore dhe zgjidhja e konflikteve të ardhshme.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.