Profesioni i agronomit, me provim shteti dhe praktikë – Ministria e Bujqësisë: Rrit besueshmërinë dhe përgjegjësinë
Ministria e Bujqësisë dhe Zhvillimit Rural kërkon të shtojë profesionin e agronomit në lisën e profesioneve të rregulluara. Kjo do të thotë, se çdo kandidat që kërkon të bëjë këtë punë, duhet të kryejë praktikën profesionale, të kryejë provimin e shtetit dhe të regjistrohet në Urdhrin e Profesionit.
Në këtë mënyrë, agronomët marrin të njëjtin status si mjekët, farmacistë, arkitektët, ixhinierët, etj.
Në relacionin që shoqëron projektligjin për konsultim publik, Ministri Peleshi shprehet se në këtë mënyrë rritet besueshmëria dhe përgjegjësia e këtij profesioni, duke i dhënë një vlerë të shtuar dhe rritur ndikimin dhe rolin në bujqësi.
“Shërbimi i mbrojtjes së bimëve, edhe pse është i ngritur me ligj dhe ka detyra të mirëpërcaktuara, që nga viti 2010 nuk ekziston. Mungesa e këtij shërbimi ka vendosur vendin tonë në një pozicion jo të favorshëm në lidhje me besueshmërinë e ofruar për masat fitosanitare të marra për produktet me origjinë bimore që Shqipëria eksporton. Këta profesionistë duhet të certifikojnë të gjitha produktet e kësaj kategorie që eksportohen dhe që kanë trend rritës nga viti në vit. Aktualisht ky certifikim është fiktiv, sepse agronomët kanë ikur në drejtim të paditur”, shkruhet në relacion mbi gjendjen aktuale.
Krahas fitimit të besueshmërisë në tregjet ndërkombëtare mbi standardet në bujqësi, ministria shprehet se përfitim është edhe vlerësimi profesional, i cili bëhet realitet vetëm përmes këtij ligji.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.