Rastet botërore shënojnë 250 milionë – Infeksionet me Covid në Europën Lindore, në nivele rekord
Rastet botërore me Covid-19 kanë kaluar 250 milionë ditën e Hënë, ndërkohë që disa vende në europën lindore kanë pasur numër rekord të infeksioneve, edhe pse rritja e variantit Delta po zbutet dhe shumë vende kanë rinisur tregtinë dhe turizmin. Numri mesatar i rasteve ditore ka rënë me 36% në 3 muajt e fundit, sipas një analize të Reuters, por virusi po vazhdon të infektojë 50 milionë njerëz çdo 90 ditë, për shkak të transmetueshmërisë së variantit Delta.
Për kontrast, 50 milionëshi i parë me Covid-19 u arrit në thuajse 1 vit. Ekspertët e shëndetësisë janë optimist se shumë vende kanë kaluar pjesën më të keqe të pandemisë falë vaksinave dhe ekspozimit natyror, pavarësisht se kanë paralajmëruar se moti i ftohtë dhe sezoni i pushimeve mund të rrisë rastet. Shefja teknike e pandemisë tek OBSH, Maria Van Kherkove, ka thënë më herët gjatë muajit se nga tani e deri në fund të vitit 2022, është momenti ku vihet nën kontroll virusi dhe ulen ndjeshëm vdekjet nga sëmundja.
Infeksionet janë rritur në 55 nga 240 vende, me Rusinë, Ukrainën dhe Greqinë që janë pranë apo në nivel rekord të rasteve të reja, që kur nisi pandemia 2 vite më parë. Europa Lindore ka ndër normat më të ulëta të vaksinimit në rajon. Më shumë se gjysma e infeksioneve të reja të raportuara në të gjithë botën, ishin nga shtetet Europane. Shumë liderë në botë kanë vënë theksin tek përmirësimi i programeve të vaksinimit në botë, veçanërisht në shtetet e varfëra. Më shumë se gjysma e popullsisë botërore nuk ka marrë një dozë të parë të vaksinës, një shifër që bie në 5% në vendet e varfëra.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.