Rekord i importit të ëmbëlsirave gjatë majit – Rusia “rrëmben” skenën, bëhet importuesja më e madhe në vend, me 45% të totalit

Asnjë muaj maj që prej vitit 2007 nuk regjistronte një volum më të madh se maji i 2020-ës sa i përket importit të sheqernave dhe ëmbëlsirave, thonë të dhënat më të fundit të Instat. Në vlerë ndërkohë, maji shënon shifrën më të lartë në thuajse 2 vite, sinjalizojnë të dhënat e tregtisë së jashtme. Gjatë muajve të pandemisë, tregtia e jashtme ka pësuar një rikonfigurim, si në drejtim të importeve, ashtu edhe në drejtim të eksporteve.

Ëmbëlsirat duket se janë një prej produkteve që janë prekur më së shumti. Gjatë muajit maj u importuan 10 ton sheqerna dhe ëmbëlsira, nga rreth 5 ton të majit të vitit 2019. Bëhet fjalë për rreth 533 milionë lekë, nga rreth 275 milionë të vitit paraardhës, dhe rreth 257 milionë të muajit prill. Por nga i importojmë në sheqernat dhe ëmbelsirat prej tij? Edhe këtu kemi një ndryshim rrënjësor të situatës pas pandemisë. Tashmë është Rusia e para, duke zënë 45% të totalit. Nga Rusia kemi importuar 244 milionë lekë sheqerna dhe ëmbelsira gjatë majit, nga vetëm 22 milionë lekë gjatë prillit.

Gjatë majit 2019 importet e ëmbëlsirave nga Rusia ishin zero. Rusia i ka zënë vendin e parë të listës së importuesve tanë më të mëdhenj të ëmbëlsirave, Francës, që ka zbritur në vendin e dytë, me rreth 128 milionë lekë importe. Në vend të tretë ndjek Polonia me rreth 83 milionë lekë. Këto tre shtete, pra Rusia, Franca dhe Polonia zënë 85% të importit të ëmbëlsirave në vendin tonë gjatë majit.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.