Rritet papunësia në Turqi – Shënon 14.7% në Shkurt, niveli më i lartë në 1 dekadë
Norma e papunësisë në Turqi u rrit në 14.7% në periudhën Dhjetor-Shkurt, që është niveli më i lartë në 1 dekadë, ndërkohë që efektet e krizës së valutës në vitin e kaluar kanë vazhduar të ndikojnë punëtorët. Norma në muajin Janar qëndronte në 13.5% dhe përfshiu një rritje të madhe të papunësisë tek të rinjtë, në nivelin më të lartë që prej vitit 2005. Ekonomia turke u tkurr me 3% në tremujorin e katërt 2018, që është performanca më e dobët në një dekadë. Valuta ra me 30% vitin e kaluar, duke sjellë dëme për ekonominë.
Presidenti Erdogan dhe ministri i Financave, Berat Albayrak, kanë thënë se Turqia ka lënë pas trazirat ekonomike. Inflacioni ka nisur rënien nga niveli i lartë i vitit të kaluar dhe deficiti i llogarisë korrente të vendit është tkurrur ndjeshëm. Megjithatë, personat e regjistruar si të papunë u rritën në 4.67 milionë në periudhën tremujore deri në Shkurt, një rritje me më shumë se 1 milionë nga e njëjta periudhë një vit më parë, sipas institutit turk të Statistikave. Punësimi përjashtuar bujqësinë u rrit në 16.8%, nga 15.6% që ishte në Janar.
Agjencia e vlerësimit të kreditit Moody’s, bëri të ditur se papunësia në Turqi pritet të rritet në muajt e ardhshëm, ç’ka do të ndikojë te konsumi privat dhe investimet. Papunësia te grupmosha 15-24 vjeç, u rrit në 26.7%, që është niveli më i lartë që prej vitit 2005.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.