Rusia, drejt tregjeve të reja të grurit – Klientët tradicionalë konkurrohen nga gruri i Ukrainës dhe Rumanisë

Eksportet e grurit nga Rusia do të pozicionohen mirë edhe në gjysmën e dytë të këtij sezoni, pasi taksa e eksporteve e Moskës dhe konkurrenca e ashpër me Ukrainën dhe Rumaninë do të ngadalësojë shitjet deri në fund të vitit 2021, shprehen tregtarët dhe analistët. Rusia, që është eksportuesi më i madh i grurit në botë, zakonisht e shet pjesën më të madhe të të korrave në gjysmën e parë të sezonit të shitjeve, që fillon më 1 korrik.

Megjithatë, eksportet janë më të ulëta deri më tani, për shkak se fermerët e kanë magazinuar grurin, për shkak të taksës së vendosur nga Moska, e cila ndryshon çdo javë, sipas një formule komplekse. Kompania konsulente, SovEcon, parashikon se eksportet në dy muajt e parë të sezonit do të arrijnë një total prej 5.3 milionë ton, nga 7 milionë ton që ishin në fund të gushtit të vitit të kaluar.

Shitjet e Rusisë ndaj autoritetit shtetëror në Egjipt, që është blerësi kryesor, janë relativisht të ulëta kryesisht për shkak të konkurrencës së ashpër nga Ukraina dhe Rumania, që po regjistrojnë një sezon mjaft të mirë gjatë këtij viti. Taksa e eksportit të grurit, ndërkohë, pritet të vazhdojë të rritet në muajt në vijim, por pamundësia për t’a parashikuar këtë taksë e bën më të vështirë për tregtarët të rezervojnë shitje.

Rusia mund të bëhet më atraktive për tregtarët në fund të vitit 2021, kur Ukrania dhe Rumania kanë më pak grurë për të ofruar. Sidoqoftë, kërkesa për grurin rus është e lartë në tregjet e reja. Analistët parashikojnë se Rusia do të furnizojë me një sasi rekord Arabinë Saudite, pasi një prodhim me cilësi më të mirë po e ndihmon të konkurrojë me vendet e tjera europiane.

Klevis Llaha/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.