Sfidat e buxhetit në Itali – Populistët premtojnë defiçit më të madh, do të prekë 3% të PBB
Liderët e koalicionit drejtues në Itali u rikthyen në sulm, duke këmbëngulur se do të ndjekin premtimet e shtrenjta të bëra gjatë fushatës. Ata hodhën poshtë përpjekjet për të qetësuar investitorët të ministrit të Financave, Giovanni Tria, ndërkohë që agjencia e vlerësimit të kreditit Fitch, uli perspektivën për Italinë.
Zv/ kryeministri Matteo Salvini, tha se buxheti i radhës do të dyfishojë defiçitin, duke prekur tavanin e Bashkimit Europian prej 3%. Sipas tij, Qeveria do të përpiqet të respektojë të gjitha rregullat që vendos Europa, por mirëqenia e qytetarëve italianë është prioritet.
Lideri i lëvizjes 5 yjet, Luigi Di Maio, rikujtoi gjithashtu prioritetet për të ardhurat për qytetarët, taksën e sheshtë dhe riorganizimin e ligjit aktual të pensioneve. Sipas tij, plani për të ardhurat bazë, që është cilësuar si një shpenzim gjigant nga kritikët, do të zbatohet në vitin 2019.
Planet fiskale të koalicionit qeverisës kanë qenë në qendër të vëmendjes së investitorëve, ndërkohë që interesat e borxhit italian janë rritur, duke reaguar ndaj premtimeve të shtrenjta të partive populiste. Javën e kaluar, Fitch ndryshoi perspektivën për Italinë në negative nga të qëndrueshme dhe la notën përfundimtarë dy gradë sipër nivelit mbeturinë, duke përmendur problemet në buxhet.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.