SHBA ka rihapur kufijtë e saj, por cilat janë rregullat e reja të udhëtimit?!
Nga sot 08 Nëntor, të rriturit që mbërrijnë në Shtetet e Bashkuara do të duhet të vaksinohen plotësisht, me vetëm disa përjashtime të kufizuara, dhe të gjithë udhëtarët do të duhet të tregojnë një rezultat negativ të testit COVID-19.
Udhëtarët e vaksinuar do të duhet të tregojnë një rezultat negativ të testit të marrë brenda 72 orëve nga mbërritja në SHBA. Udhëtarët e pavaksinuar do të duhet të tregojnë një rezultat negativ të testit të marrë brenda 24 orëve nga mbërritja.
Fëmijëve nën 18 vjeç nuk do t’u kërkohet të vaksinohen plotësisht për shkak të vonesave në kualifikimin e tyre për vaksina në shumë vende. Por ata ende do të duhet të tregojnë një rezultat negativ të testit. Fëmijët nën 2 vjeç janë të përjashtuar nga ky rregull.
Linjave ajrore u kërkohet të mbledhin informacione kontakti për të gjithë pasagjerët, pavarësisht nëse janë të vaksinuar apo jo, për të mundësuar gjurmimin e kontakteve.
Udhëzimi zyrtar mbi kufizimet e udhëtimit në SHBA është i disponueshëm këtu.
Cilat vaksina pranon qeveria amerikane?
SHBA do të pranojë çdo vaksinë të miratuar për përdorim të rregullt ose urgjent nga Administrata e Ushqimit dhe Barnave e SHBA-së ose Organizata Botërore e Shëndetësisë. Kjo përfshin vaksinat Pfizer, Moderna, Johnson & Johnson, AstraZeneca dhe Sinopharm dhe Sinovac të Kinës. Dozat e përziera të miratuara pranohen gjithashtu.
Kush përjashtohet nga rregullat e vaksinimit?
Personat që morën pjesë në provat klinike të COVID-19, kishin reaksione të rënda alergjike ndaj vaksinave ose janë nga një vend ku vaksinat nuk janë gjerësisht të disponueshme, përjashtohen.
Kjo kategori e fundit mbulon njerëz nga vende me përqindje vaksinimi nën 10% të të rriturve. Ata mund të pranohen në SHBA me një letër qeveritare që autorizon udhëtimin për një arsye bindëse. Vlerësohet se janë rreth 50 vende për të cilat do të zbatohen këto rregulla.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.