SHBA, ngadalësohet punësimi – Gjatë gushtit u krijuan 156 mijë vende të reja pune
Rritja e punësimit në Shtetet e Bashkuara të Amerikës është ngadalësuar më shumë se parashikimet e analistëve, gjatë gushtit, pas dy muajsh në rritje të fuqishme.
Por, gjithsesi, analistët mendojnë se hapi i rritjes së punësimit ishte i mjaftueshëm, që Rezerva Federale të fillojë zvogëlimin e portofolit të bonove.
Rritja e vazhdueshme e pagave, megjithatë, e bën Bankën Qendrore Amerikane më të kujdesshme për rritjen e normave të interesit sërish gjatë këtij viti.
Departamenti i Punës deklaroi se, punësimi, me përjashtim të sektorit bujqësor, u rrit me 156 mijë njësi gjatë gushtit.
Ekonomistët parashikonin se, ekonomia amerikane do të krijonte 180 mijë vende të reja pune. Ndërsa në qershor dhe korrik, ekonomia më e madhe në botë krijoi 399 mijë vende pune.
Këto të dhëna patën ndikim minimal në tregjet e aksioneve dhe te dollari amerikan. Departamenti i Punës deklaroi se, uragani Harvey, që shkatërroi një pjesë të mirë të Teksasit nuk pati efekt domethënës në punësim.
Por ekonomistët parashikojnë se, efektet do të transmetohen në të dhënat e muajit shtator, nëse përmbytjet do të zgjasin.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.