Shërbimi i telefonisë për Kuvendin – 1.9 mln lekë për muajt e mbetur deri në fund të 2017

Mbledhja e parë e legjislaturës së IX të Kuvendit të Shqipërisë pritet që të zhvillohet më 9 shtator. Në prag të fillimit të punës nga Kuvendi, vetë institucioni ka shpallur një  kërkesë për ofrimin e shërbimeve të telefonisë celulare.

Fondi limit i  vënë në dispozicion është 1.9 milionë lekë pa TVSH, i llogaritur për 4 muaj. Sipas një vendimi të Këshillit të Ministrave të 23 korrikut të vitit 2010, punonjësit e administratës duhet të pajisen me numra të telefonisë celulare sipas funksioneve që ata kryejnë.

Ky shërbim është ndarë në gjashtë  linja të cilat nënkuptojnë edhe vlerën e mbulimit të pagesës që bëhet për telefonat nga buxheti i shtetit për punonjësit e administratës.  Në linjën e parë që përfitojnë edhe shërbim pa limit janë presidenti, kryeministri, kryetari kuvendit,  kryetari gjykatës kushtetuese dhe prokurori i përgjithshëm.

Vlera e mbulimit të këtij shërbimi për  kryetarin e gjykatës së lartë është 63 mijë lekë në muaj, dhe konsiderohet si linja e dytë. Zëvendëskryeministri dhe zëvendëskryetari i kuvendit janë të përfshirë në linjën e tretë dhe përfitojnë një mbulim prej 60 mijë lekë në muaj.

Vlera e mbulimit të telefonit për  ministrat, avokatin e popullit , kryetarin e KLSH, dhe drejtorin e SHISH është 50 mijë lekë në muaj. Ndërsa drejtori  i përgjithshëm i doganave, tatimeve dhe policisë së shtetit mbulohen në vlerën e 35 mijë lekëve.

Në linjën e fundit që përfitojnë një mbulim prej 10 mijë lekësh në muaj janë  ata që kanë pozicionin e sekretarit të përgjithshëm në ministri, drejtori i  drejtorisë së përgjithshme  si dhe çdo funksionar tjetër që ka pagë të njëjtë apo më të lartë se ky funksion.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.