Sistem i përbashkët kundër krimit – Shenjat e gishtërinjve, ADN-ja e makinat, online në kohë reale me 11 vende

Komisioni Parlamentar i Ligjeve ka miratuar të enjten marrëveshjen që e bën pjesë të Konventës së Bashkëpunimit Policor për Evropën Juglindore, për shkëmbimin e automatizuar të të dhënave të ADN-së, daktiloskopike dhe të të dhënave të regjistrimit të automjeteve për personat e nën hetim për lidhje me krimin e organizuar, korrupsionin apo terrorizmin.

Detajet e marrëveshjes u paraqitën në Komision nga zëvendësministri i Brendshëm, Besfort Lamallari. i cili tha se pjesëmarrja e Shqipërisë në Konventë bëhet e gjitha në funksion të një lufte më efikase kundër krimit të organizuar dhe krimit ndërkufitar, hetimit të krimit, parandalimit dhe vënies para përgjegjësisë së autorëve të tyre, pavarësisht nëse janë shtetas shqiptarë që kanë kryer krime këtu dhe jashtë vendit apo anasjelltas.

Aktualisht Shqipëria ka nisur punën për ngritjen e sistemit të elektronik për shkëmbimin e të dhënave, përmes të cilit të vijim do të procesohen edhe të dhëna financiare apo doganore.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.