Skandali, kompania japoneze e çelikut akuzohet për cilësinë – Falsifikoi të dhënat e produkteve
Kompania “Kobe Steel” është akuzuar për shkelje të ligjit të konkurrencës në Japoni, pasi firma ka pranuar se ka falsifikuar të dhënat e forcës dhe cilësisë së produkteve të shitura qindra klientëve në vende të ndryshme të botës.
Kobe Steel, i cili është prodhuesi i tretë më i madh i çelikut në Japoni, pranoi për herë të parë mashtrimin në lidhje me cilësinë vitin e kaluar. Firma tha të enjten se i vinte shumë keq për shqetësimet dhe problematikat që kishte shkaktuar tek klientët e saj.
Kobe Steel është një ndër furnizuesit kryesorë të industrisë së makinave, aeroplanëve dhe trenave në mbarë botën.
Gjigandët e prodhimit duke përfshirë Boeing, Toyota dhe General Motors kanë qenë duke hetuar nëse ata kanë përdorur ndonjë nga materialet nën standard. Megjithatë, ende nuk janë raportuar çështje të sigurisë.
“Edhe një herë kërkojmë ndjesë për problemet dhe shqetësimet e konsiderueshme që u kemi shkaktuar klientëve tanë, furnizuesve, aksionerëve dhe shumë personave të tjerëve lidhur me sjelljen e keqe dhe produktet jo cilësore të Kobe Steel Ltd dhe kompanive të saj të grupit”, u shpreh firma në lidhje me aktakuzën e bërë nga Zyra e Prokurorëve të Tokios.
Vetë kompania konfirmoi se stafi kishte ndryshuar dhe modifikuar të dhënat për cilësinë e disa prej produkteve të saj para se ato të dërgoheshin tek prodhuesit.
Raporti i bërë doli në përfundimin se kompania Kobe Steel kishte “çështje të thella” të brendshme rreth kulturës korporative dhe pajtueshmërisë.
Skandali tashmë ka shkaktuar tronditje brenda vetë bordit drejtues të kompanisë, duke sjellë edhe dorëheqjen e shefit ekzekutiv të saj, Hiroya Kawasaki, ndër të tjera.
Firma po përballet gjithashtu me veprimet dhe pasojat ligjore në SHBA dhe Kanada për keqbërje dhe dëmtim të kompanive në këto vende të cilat merrnin lëndë të parë nga kjo kompani japoneze.
s.g/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.