Studimi/ Covid në shtatzëni është më i rrezikshëm për gratë e pavaksinuara!

Mos vaksinimi kundër Covid gjatë shtatzënisë është rrezik jo vetëm për fëmijën e palindur, por edhe për nënën: kjo është ajo që del nga disa studime që kanë krahasuar rreziqet në shtatzëni për gratë e infektuara me Covid dhe gratë e shëndetshme. Pamja e përgjithshme që u shfaq është e qartë: nënat e ardhshme të pavaksinuara që infektohen me Covid gjatë shtatzënisë janë jo vetëm në rrezik më të madh për t’u përballur me një lindje të parakohshme ose për të lindur një foshnjë të pajetë, por edhe për t’u shtruar në spital ose për të përfunduar në kujdes intensiv , krahasuar me moshatarët shtatzëna dhe të vaksinuara.

Rezultatet e një analize të publikuar në Nature kanë të bëjnë me dhjetëra mijëra gra skoceze të cilat janë ndjekur gjatë gjithë vitit të parë të vaksinimeve. Përveç zbulimit të një hezitimi shqetësues për vaksinimin tek gratë shtatzëna (tre në dhjetë ishin vaksinuar në tetor 2021, krahasuar me pothuajse tetë në dhjetë gra jo shtatzëna të së njëjtës moshë), studimi zbuloi një rrezik më të lartë për gratë e infektuara dhe foshnjat: nga 620 nënat e infektuara 28 ditë para përfundimit të shtatzënisë, katërmbëdhjetë (asnjëra prej të cilave nuk ishte e vaksinuar) duhej të përballeshin me vdekjen e fetusit. Një rrezik prej 22.5 rastesh në 1000, shumë më i lartë se mesatarja prej 5.6 rastesh në 1000 të regjistruara në Skoci nga marsi 2020 deri në tetor 2021.

Ndonëse është e vërtetë që nënat që infektohen në muajin e fundit të shtatzënisë kanë rreziqet më të mëdha, infektimi me Covid në çdo muaj të shtatzënisë rrit gjasat për të pasur një lindje të parakohshme, siç ishte vënë re tashmë nga studimet e mëparshme dhe siç konfirmohet nga studime të mëtejshme në Lancet. Analiza skoceze nxjerr në pah rrezikun e më shumë se 10% të nënave të infektuara për të lindur fëmijën e tyre para afatit, dhe më shumë se 16% nëse infeksioni ndodh gjatë 28 ditëve të fundit të shtatzënisë, krahasuar me 8% të grave të shëndetshme të analizuara nga Mars 2020 deri në Tetor 2021.

Tani ne e dimë jo vetëm që vaksinimi nëse jeni shtatzënë është i sigurt, por edhe që gratë shtatzëna duhet të kenë përparësi për rreziqet që lidhen me një infeksion të mundshëm Covid: edhe studimi skocez na jep konfirmimin përsa i përket sigurisë, duke mos gjetur asnjë rritje të rrezikut të lindjes së parakohshme ose vdekjes së fetusit në rreth 26,000 gra shtatzëna të vaksinuara që morën pjesë në studim. FCS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.