Taksa 100% ndaj mallrave serbe – Haradinaj: Kosova ka marrë më shumë vetëbesim, prioritet prodhimet vendase
Pas vendosjes së tarifës doganore 100% ndaj mallrave Serbe, Kosova ka marrë më shumë vetëbesim. Deklarata ka ardhur nga kryeministri i Kosovës, Ramush Haradinaj, gjatë një takimi të mbajtur me prodhuesit, i cili u quajt edhe Konventa e Parë e Prodhuesve të Kosovës. Sipas tij, vendosja e tarifës erdhi si një reagim i fushatës politike kundër anëtarësimit të Kosovës në Interpol.
“Kosova ka më shumë vetëbesim në prodhim, ne i kemi heqë taksat e krejt çka i kanë penguar prodhuesit vendorë, vendimi tjetër që kemi marrë ka qenë dhënia e tokave për komunat për krijimin e zonave ekonomike”, tha Haradinaj.
Ndërkohë, shtoi më tej se vendimi për taksën nuk është marrë nga vetë ai, por nga Ministria e Industrisë dhe Tregtisë. Po ashtu,
“Së fundmi kemi marrë vendim për taksën për Serbinë dhe Bosnjën, propozimi ka ardhur nga MTI dhe jo nga unë. I shpreh keqardhje gjithkujt që mendon se i kemi ndikuar në biznes me këtë taksë, por nuk është vetëm interesi i prodhuesve por i qytetarëve të vendit për të mirën e tyre. Ju vet e dini që produktet ‘Made in Kosova’ sa e kanë pasur të vështirë të hyjnë në këto tregje të këtyre shteteve”, tha ndër të tjera kreu i Kosovës.
Ndërkohë, duke u ndalur tek prodhuesit, Haradinaj tha se ‘kanë para vetes një periudhë të artë’, pasi tashmë theksi do të vihet tek prodhimi vendas, duke e bërë dominuesin kryesor në tregje.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.