Tarifat bëhen efektive – Trump kërcënon barriera shtesë në $500 mld mallra, nëse Pekini reagon

Presidenti Donald Trump deklaroi se po konsideron vendosjen e tarifave shtesë në 500 miliardë dollarë mallra kinezë, nëse Pekini kundërpërgjigjet.

Tarifat amerikane ndaj 34 miliard dollarë mallra janë bërë efektive këtë të Premte. Barriera të tjera për 16 miliard dollarë pritet të bëhen efektive pas 2 javësh dhe mbi 500 miliardë dollarë më vonë, sipas Trump.

Kina u kundërpërgjigj duke caktuar tarifa të vetat në disa importe amerikane, raportuan mediat shtetërore, pak orë pas hyrjes në fuqi të penaliteteve amerikane.

“Fillimisht janë 34 miliard dollarë,  më pas 16 miliardë pas dy javësh dhe kemi në pritje tarifa për 500 miliardë dollarë mallrat ë tjerë. Ka të bëjë vetëm me Kinën“, tha presidenti i Shteteve të Bashkuara Donald Trump.

Deklaratat e Donald Trump përforcojnë kërcënimet e mëparshme se ai do ta përshpejtojë luftën tregtare.

Konflikti me Kinën ka tronditur tregjet financiarë në të gjithë botën, përfshirë aksionet, valutat dhe tregtinë globale të lëndëve të para, nga soja e deri te qymyri.

Klevis  Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.