Tenderi 28 mln USD i uniformave, në gjykatë – SPAK mbyll hetimet për 10 zyrtarët e Ministrisë së Brendshme të përfshirë në skandal

SPAK ka përfunduar procedurën hetimore dhe ka dërguar në gjykatë dosjen e 10 zyrtarëve të Ministrisë së Brendshme të përfshirë në skandalin e tenderit të uniformave të forcave të rendit.

Të pandehur përpara Gjykatës së Posaçme Kundër Krimit e Korrupsionit do të jene ish drejtoresha e Agjencisë së Blerjeve të Përqendruara  Edlira Naqellari dhe bashkëpunëtorët e saj anëtarët e njësisë së prokurimit, Flutura Çekrezi, Ani Omuri, Kleivis Hasani, Anisa Bogdani,  dhe anëtarët e komisionit të vlerësimit të ofertave, Kreshnik Bejkaj, Fatmir Demneri, Mariglen Buzali dhe Gëzim Mingaj.

Që të gjithë akuzohen për shkelje të barazisë së pjesëmarrësve në tendera apo ankande publike”, parashikuar nga neni 258, 25 i Kodit Penal.

Arrestimet e 10 zyrtarëve dhe ish zyrtarëve të Ministrisë së Brendshme janë bërë në lidhje me tenderin abuziv të  11 majit 2020 përmes të cilit u blenë uniformat e policisë me vlerë 2.8 miliardë lekë, afërsisht 28 milionë dollarë.

Bëhet me dije se SPAK ka përgjuar dhe vëzhguar 9 zyrtarët, ndërsa kanë qenë bashkëpunëtorët e drejtësisë ata që kanë pranuar dëshmojnë duke zbardhur skemën e abuzimit me tenderin. Ky tender është refuzuar të firmoset nga një anëtar i Komisionit dhe një anëtar i prokurimeve.

Tenderi u vu në shënjestër edhe nga mediat e opinion public për shkak të çmimeve mjaft të larta me të cilin qenë blerë uniformat, ku kujtojmë se vetëm një kapele ka kushtuar rreth 350 euro.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.