Transformimi i ESM në FMN – Europa kërkon pavarësi gjatë ndihmave financiare në euro

Pas disa programeve të shpëtimit, marrëdhënia e Europës me Fondin Monetar Ndërkombëtar mund të ndryshojë rrënjësisht. Politikëbërësit në Eurozonë po studiojnë mënyra se si të fuqizojnë Mekanizmin Europian të Stabilitetit (ESM), fondin që ndihmon, nëpërmjet financimit, vende anëtare, si dhe për  largimin përfundimtar të prezencës së FMN në programet e shpëtimit.

Plane të detajuara nga Komisioni Europian priten deri në fund të vitit, megjithatë qëllimi është dhënia e më shumë përgjegjësie Mekanizmit Europian të Stabilitetit për të monitoruar dhe kërkuar zbatimin të reformave në këmbim të programeve të shpëtimit ndërkohë që disburson fonde, që është praktikisht detyra e Fondit në Washington.

“Eurozona është më e fortë tashmë se në vitet e kaluara dhe mendoj që ESM duhet të rritet gradualisht në një Fond Monetar Europian, që duhet të funksionojë sipas rregullave të Bashkimit Europian”,  tha më herët gjatë muajit presidenti i Komisionit, Jean-Claude Juncker.

Kjo ide e liderëve europianë, përfshirë presidentin francez Emmanuel Macron, vjen për të thelluar lidhjet mes Eurozonës, me qëllim mbrojtjen nga goditjet financiare të ardhshme.   Kryesisht, ky propozim do ta bënte Europën të pavarur nga FMN, çdo herë që ndonjë vend i përshtatur me euron kërkon ndihmë financiare.  Sipas analistëve, një Fond Monetar Europian do të zgjidhte problemet e Eurozonës pa ndërhyrjen e ndonjë organizate të huaj.

Gjatë krizës greke, ka patur perspektiva të ndryshme mes FMN dhe Europës mbi suficitin primar të vendit apo ristrukturimin e borxhit.  Kjo ide mund të mirëpritet edhe nga Gjermania. Ekonomia më e madhe e Europës ka patur qasjen më kritike ndaj detyrës së Komisionit si autoritet fiskal.

Krahu ekzekutiv i Bashkimit Europian është përgjegjës për monitorimin e zbatimit të rregullave mbi deficitin dhe borxhin të vendeve anëtare, ku pavarësisht shumë devijimeve në rajon, nuk ka vendosur ndonjëherë gjoba.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.