Tregtia në Gjermani – Fuqizimi i importeve tkurr suficitin, Bundesbank rrit projeksionet

Eksportet në Gjermani janë rritur sipër pritshmërive për muajin Prill, ndërsa importet treguan një rritje akoma më të madhe, duke tkurrur suficitin tregtar të ekonomisë më të madhe të Europës.

Të dhënat tregtare, të publikuara nga Byroja Federale e Statistikave, sinjalizuan se trendi pozitiv i ekonomisë gjermane ka gjasa të vazhdojë. Një ditë më parë u publikuan edhe të dhënat mbi prodhimin industrial, që pati një rritje sipër projeksioneve.

Tkurrja e suficitit tregtar sjell lajmë të mira për Kancelaren Angela Merkel, që synon një mandat të katërt në zgjedhjet e Shtatorit. Presidenti i Shteteve të Bashkuara i ka kritikuar politikat e tregtisë dhe të shpenzimeve të ekonomisë më të madhe në Europë, duke thënë se dëmtojnë Amerikën. Eksportet u rritën me 0.9% nga muaji Mars, ndërsa importet u fuqizuan me 1.2%.

Kërkesa e brendshme ka zëvendësuar eksportet si nxitësin kryesor të ekonomisë gjermane, ndërkohë që konsumatorët po përfitojnë nga kostot e ulëta të huamarrjes dhe punësimi në nivele rekord. Suficiti tregtar ra në 19.8 miliardë euro nga 19.9 miliardë që ishte një muaj më parë, ndërsa projeksionet tregonin për 20.3 miliardë euro. Suficiti i llogarisë korrente, që mat fluksin e mallrave, shërbimeve dhe investimeve, ra në 15.1 miliardë euro, nga 31 miliardë që ishte në Mars.

Duke sjellë një tjetër shenjë pozitive, Banka Qendrore e Gjermanisë rriti projeksionet për ekonominë. Bundesbank pret tashmë një rritje me 1.9% të produktit të Brendshëm Bruto në 2017, dhe 1.7% për vitin e ardhshëm.

Projeksionet janë 0.1% më shumë se të kaluarat.  Megjithatë, pavarësisht perspektivës më të mirë për rritjen ekonomike, Bundesbank pret që inflacioni të qëndrojë poshtë objektivit të Bankës Qendrore Europiane edhe në vitin e ardhshëm. Bundesbank parashikon inflacionin në 1.5% këtë vit, 1.4% në 2018-ën dhe 1.8 pas dy vitesh.

Klevis Llaha/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.