Vijojnë përpjekjet për të liruar Kanalin e Suezit – Shtëpia e Bardhë ofron asistencë. Fillojnë efektet në tregun e energjisë

Anija që ka bllokuar Kanalin e Suezit prej disa ditësh po shkakton probleme të mëdha në qarkullimin e mallrave nga Azia drejt Europës dhe anasjelltas. Në këtë situatë, Shtëpia e Bardhë njoftoi se ka ofruar ndihmë ndaj Egjiptit, në përpjekje për të zhvendosur anijen gjigante që ka bllokuar këtë arterie të rëndësishme të qarkullimit të naftës dhe mallrave.

“Po shohim një ndikim të mundshëm në tregjet e energjisë, për shkak të bllokimit të Kanalit të Suezit. Dhe natyrisht kemi ofruar ndihmën e Shteteve të Bashkuara. Jemi në bisedime intensive me zyrtarët në Egjipt, në lidhje me këtë situatë dhe do të monitorojmë kushtet e tregut”, deklaroi”, sekretarja për mediat Jen Psaki.

Anija e quajtur Ever Given, është një ndër më të mëdhatë në botë në transportin e mallrave, me një gjatësi prej rreth 400 metra. Disa analistë frikësohen se lirimi i kanalit të Suezit, që përfaqëson rreth 12% të tregtisë globale, mund të dojë javë me radhë. Ndërkohë, në terren vijojnë përpjekjet për të liruar anijen e bllokuar, pavarësisht se misioni duket shumë i vështirë. Ekipi holandez i shpëtimit konfirmoi se kanë mbërritur edhe dy anije tërheqëse, që do të ndihmojnë në nxjerrjen e anijes.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.