Zyrtari amerikan në Tiranë – Yee takon krerët e shtetit për zgjidhjen e ngërçit politik
Zëvendës/Ndihmës Sekretari i Shtetit amerikan, Hoyt Brian Yee, u takua këtë të hënë më krerët e politikës në Shqipëri. Takimet vijnë si një përpjekje e fundit për të zgjidhur krizën politike para zgjedhjeve të qershorit ku opozita ka vendosur të mos marrë pjesë.
Axhenda e takimeve të zyrtarit të lartë amerikan i shoqëruar edhe nga ambasadori i SHBA në vendin tonë Donald Lu, nisi me një takimin në Kryeministri me shefin e qeverisë Edi Rama. Takimi filloi në orën 10:30 dhe përfundoi në 11:48.
Më pas Yee u takua me kryeparlamentarin Ilir Meta, takimi me Metën në kryesinë e kuvendit zgjati rreth 50 minuta. Ende nuk dihet nëse Zëvendës/Ndihmës Sekretari i Shtetit amerikan ka pasur një program të caktuar apo jo për zgjidhjen e ngërçit politik. Para mbërritjes në Tiranë, Yee bëri apelin e tij kundër çdo lloj bojkoti.
Gjatë fjalës së tij në forumin rajonal për siguri “2BS” në Budva të Malit të Zi, zyrtari i lartë amerikan tha se Qeveritë në rajonin e Ballkanit duhet të luftojnë kundër korrupsionit dhe udhëheqësit e rajonit duhet të gjejnë kurajën politike, për të bërë reformat e nevojshme në interes të qytetarëve.
Menjëherë pas përfundimit të takimit me kryeparlamentarin Meta në kryesinë e kuvendit mbërritën edhe përfaqësues të OSBE në Tiranë, të cilët janë pjesë e misionit monitorues të zgjedhjeve parlamentare.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.