325 milionë lekë për HEC Fierzë – Detajet e dy tenderave të KESH

KESH ka shpallur dy tendera gjatë ditëve të fundit që shkojnë për hidrocentralin e Fierzës. Fondi total për projektet është 325.2 milionë lekë. Tenderi më i fundit ka një fond 82.8 milionë lekë, i cili do të shkojë për sistemimin dhe asfaltimin e rrugës lidhëse të galerisë.

“Rehabilitimi i kësaj rruge hyrëse në galerinë e kuotës 178 mmnd është domosdoshmëri, pasi kjo rrugë është e vetmja rrugë komunikimi me pjesët e brendshme të digës, siç janë galeritë e çimentimit, pajisjet e monitorimit, stacionet e pompimit, ndriçimi i galerive, tubacionet e nxjerrjes së ujit, kabllove të energjisë, të monitorimit, etj.” Specifikohet në detajet e tenderit.

Nga ana tjetër, tenderi i dytë për HEC Fierzë ka një fond prej 242.4 milionë lekë, i cili do të vihet në funksion të rehabilitimit të galerive ndihmëse të digës. Afati kohor për ekzekutimin e projektit të këtij tenderi është 10 muaj.

Lexo edhe:

2 tenderat e KESH – Projekti për HEC Fierzë dhe HEC Koman/ Fondi dhe detajet

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.