Bankat i janë kthyer rritjes – Madhësia e sistemit i afrohet pragut të 1.5 trilionë lekëve

Madhësia e sistemit bankar në vend po i afrohet pragut të 1.5 trilionë lekëve. Të dhënat e Bankës së Shqipërisë tregojnë se sistemi bankar këtë vit i është kthyer rritjes. Në fund të muajit gusht, totali i aktiveve arriti në rreth 1.49 trilionë lekë ose rreth 12.1 miliardë euro. Përmasat e sektorit bankar janë rritur me afërsisht 2% krahasuar me të njëjtën periudhë të vitit të kaluar. Në terma realë, aktivet e bankave kanë një vlerë sa rreth 92% e Prodhimit të Brendshëm Bruto të vendit.

Gjatë viteve të krizës, rritja e sektorit bankar u ngadalësua, sidomos si rezultat i politikave të shumicës së bankave të huaja për të reduktuar përmasat e aktivitetit të tyre në Shqipëri. Por, procesi disavjeçar i ristrukturimit të sistemit bankar ka filluar të japë rezultate. Bankat që nuk ishin më të interesuara për t’u rritur janë shitur, ndërsa ato të ngelura, në shumicën dërrmuese, i janë rikthyer rritjes.

Një ndikim të konsiderueshëm frenues, sidomos vitin e kaluar, pati dhënë edhe mbiçmimi i lekut në kursin e këmbimit valutor. Duke qenë se pjesa më e madhe e aktiveve të sistemit bankar janë në valutë të huaj, efekti statistikor i kursit të këmbimit bëri që vlera e tyre në lekë të ulej. Stabilizimi i kursit mes euros dhe lekut ka bërë që këtë vit ky faktor të ketë ndikim mjaft të kufizuar.

Nga ana tjetër, rritja e sektorit bankar këtë vit po mbështetet më shumë nga zgjerimi i depozitave, që përbëjnë burimin kryesor të gjenerimit të mjeteve financiare për bankat.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.