Barnier reagon për Brexit – “29 marsi mund të shtyhet vetëm nëse ka një qëllim të qartë”

Data e Brexit, që është përcaktuar 29 marsi, mund të shtyhet vetëm nëse ka një qëllim të qartë dhe jo një përpjekje për thjesht ta shtyrë këtë datë. Deklarata është bërë nga kryenegociatori i Bashkimit Europian për Brexit, Michel Barnier.

Duke folur në një konferencë për mediat, pas takimit me kancelarin e Austrisë, Sebastian Kurz në Vienë, Barnier tha se Bashkimi Europian nuk do të kundërshtojë shtyrjen e datës së Brexit, por Mbretëria e Bashkuar duhet të ketë një qëllim të qartë. Barnier përsëriti se Londra duhet të marrë një vendim për marrëveshjen e daljes, në vend që të përpiqet të shtyjë datën.

Në anën tjetër, kancelari austriak, Sebastian Kurz u shpreh se një dalje pa marrëveshje duhet të shmanget, ndërsa një Brexit i rregullt është qëllimi kryesor. Sipas Kurz, Brexit, nëse ndodh, duhet të finalizohet përpara zgjedhjeve të Parlamentit Europian, pasi do të ishte absurde për një vend që kërkon të largohet nga unioni të votojë për legjislaturën e re.

Të mërkurën, parlamenti britanik votoi pro ndryshimeve të votimit, të propozuar nga kryeministrja Theresa May. Sipas parashikimeve, Parlamenti i Britanisë do të votojë për marrëveshjen e rishikuar të Brexit në datën 12 mars. Nëse marrëveshja refuzohet sërish, parlamenti do të votojë më 13 mars nëse do të largohet pa marrëveshje. Në refuzohet edhe një dalje pa marrëveshje, parlamenti do të votojë më 14 mars për të shtyrë datën e Brexit.

Sekretari britanik i Brexit, Stephen Barclay, deklaroi se nuk ka konsensus në Parlament për të zhvilluar një referendum të dytë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.