Basha për mediat: ‘Nuk kemi të bëjmë me një krizë energjetike, por me një krizë korrupsioni’

Pas mbledhjes së grupit parlamentar, kryetari i Partisë Demokratike, Lulzim Basha ka dalë në një prononcim për mediat ku ka folur për krizën energjitike. Sipas Bashës nuk kemi të bëjmë me një krizë energjetike, por me një krizë korrupsioni. Ai shtoi se pak muaj më parë energjia u shit me 1/3 e çmimit që do të blihet sot.

“Ju ftojmë që t’i drejtoni kamerat te qytetarët, në rrugë, apo te dyqanet. Te dyqanet, kamerat tuaja do të fiksojnë qytetarë që blejnë me listë. Nuk dua që të them se ky problem lindi sot, por është një problem më i madh se kurrë. Në veçanti pas tellallit të të keqes, Edi Ramës, që doli dhe njoftoi rritjen e çmimeve, të cilat kanë kapërcyer, jo thjesht energjia, pasi gjithçka lidhet me bukën, produktet, dhe shërbimet. Të pretendosh se ka diçka më të rëndësishme sot, është papërgjegjshmëri. Të mos bësh gjithçka që ke në dorë, jo thjesht për të denoncuar, dhe të jesh zëri i këtyre njerëzve, por për të treguar me forcë se ky problem i shkaktuar nga korrupsioni i Ramës nuk zgjidhet me fjalime dhe propagandë dhe pseudo paketa që përpiqen që të fshehin vjedhjen. Sot shteti shqiptar i ka mundësitë që t’i japë fund shkaktuat themelor të kësaj krize. Paratë e buxhetit shkojnë për afera korruptive. Më e madhja që lidhet me këtë krizë është ajo që përmenda. E kanë shitur më lirë dhe duan që ta blejnë me 3 fish më të lartë çmimin. Shihni sa hipokrit dhe tallës janë. Sa të pashpirt janë. Për oligarkët e kanë hequr TVSH e jahteve. Oligarkëve iu bën punë, të varfërve jo. Ai qëndron në atë poltron si peng i krimit të organizuar. Ne kemi shpalosur para jush që prej janarit të këtij viti 1 plan të detajuar për të nxjerrë vendin nga kriza. Një pjesë e këtij plani ka të bëjë me energjinë. Ne do të vazhdojmë me të gjitha format dhe mënyrat që të bëjmë punën tonë karshi shqiptarëve. Do vëmë gishtin në plagët që janë shkaktuar dhe duke mbështetur me të gjitha format dhe mënyrat duke nxitur dhe inkurajuar format e reagimit qytetar.”, tha Basha.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.