Bashkitë, 14% e punësimeve të paligjshme – Raporti i KMSHC: 891 pozicione pune në kundërshtim me ligjin në vitin 2020
Punësimet në kundërshtim me ligjin nëpër bashki mbeten një problem i bartur vit pas viti. Komisioni i Mbikqyrjes së Shërbimit Civil raporton se për vitin 2020, rreth 14% e punësime janë kryer në shkelje të ligjit.
Gjatë mbikëqyrjes u konstatua se në administratën e njësive të qeverisjes vendore, janë rreth 6090 pozicione pune në shërbim civil, që zëne rreth 30% të numrit të përgjithshëm të administratës vendore (rreth 23000 pozicione pune gjithsej). Janë evidentuar 4611 pozicione, ose 76% e numrit të përgjithshëm të pozicioneve të punës në shërbimin civil, të plotësuara në përputhje me ligjin, nëpërmjet procedurës së konkurrimit ose deklarim statusi, sipas nenit 64, të ligjit nr. 152/2013; 891 pozicione pune, ose 14% e pozicioneve të punës që janë pjesë e shërbimit civil, të plotësuara në kundërshtim me ligjin, nëpërmjet emërimeve të përkohshme duke mos respektuar procedurat e konkurrimit; si edhe 588 pozicione pune të lira, ose 10% e pozicioneve të punës që janë pjesë e shërbimit civil.
Rastet më të theksuara të paligjshmërisë u konstatuan në disa subjekte, ndër të cilat si shembull përmendim: Qarkun Elbasan, ku u konstatuan 173 raste të emërimeve me kontratë (të cilat zënë rreth 28 % të pozicioneve të shërbimit civil në rang qarku dhe rreth 19.4% e numrit të përgjithshëm të pozicioneve të shërbimit civil në administratën vendore të plotësuar me akt të përkohshëm emërimi); Qarkun Kukës, 113 raste të emërimeve me kontratë (të cilat zënë rreth 44% të pozicioneve të shërbimit civil në rang qarku dhe rreth 12.7% të numrit të përgjithshëm të pozicioneve të shërbimit civil të plotësuar me akt të përkohshëm emërimi në administratën vendore); Qarkun Gjirokastër, 100 raste të emërimeve me kontratë (që zënë rreth 37% të pozicioneve të shërbimit civil në rang qarku dhe rreth 11.2% të numrit të përgjithshëm të pozicioneve të shërbimit civil në administratën vendore); Qarkun Shkodër, 95 raste të emërimeve me kontratë (që zënë rreth 21% të pozicioneve të shërbimit civil në rang qarku dhe rreth 10.7% e numrit të përgjithshëm të pozicioneve të shërbimit civil të plotësuar me akt të përkohshëm emërimi), e raste të tjera të cilat janë evidentuar në tabelën mësipër.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.