BE-ja do të ulë importet e gazit rus me dy të tretat deri në vitin 2023!

Brukseli do të ulë me dy të tretat varësinë e Bashkimit Europian nga gazi rus në përgjigje të luftës në Ukrainë, njoftoi të martën Komisioni Europian.

Europa do të reduktojë importet e saj të gazit rus nga 155 miliardë metra kub (bcm) në 100 bcm në vit dhe synon të kompensojë mungesën me furnizim nga ofruesit e gazit natyror të lëngshëm (LNG), si Shtetet e Bashkuara dhe Katari, si dhe burime të qëndrueshme të energjisë si biometani, hidrogjeni i pastër dhe energjia e rinovueshme.

Sipas shifrave të publikuara nga Bruegel, një institut ekonomik, pjesa e Rusisë në importet e gazit ra nga 47% në janar 2021 në 28% në janar 2022, mes tensioneve përgjatë kufirit me Ukrainën.

Çështja e varësisë nga energjia, tashmë e lartë në rendin e ditës përpara fillimit të pushtimit, është ngritur në një nivel të ri për shkak të frikës se kërkesa europiane për gaz mund të financojë luftën e Rusisë në Ukrainë. Më shumë se 40% e të ardhurave të vendit vijnë nga sektorët e gazit dhe naftës.

Planet nga Brukseli pasojnë një sërë sanksionesh agresive që synojnë të gjymtojnë aparatin ushtarak të presidentit Vladimir Putin, por nuk arrijnë një ndalim total të energjisë, siç njoftoi qeveria e SHBA në të njëjtën ditë. Në vend të kësaj, Brukseli po rrit përpjekjet për të diversifikuar shpejt shportën e tij të ofruesve të energjisë dhe për të zvogëluar praninë e Rusisë në masën më të madhe të mundshme.

Gjatë javës së kaluar, zyrtarët e BE-së kanë kontaktuar me eksportuesit e gazit si SHBA, Norvegjia, Katari, Azerbajxhani, Algjeria, Egjipti, Turqia, Japonia dhe Koreja e Jugut për të siguruar alternativa ndaj tubacioneve ruse, të cilat sot janë përhapur në frontin lindor të bllokut. dhe lidh disa shtete anëtare.

Si rezultat, janari 2022 pa nivelet më të larta ndonjëherë të importeve të LNG në BE, duke arritur në 10 miliardë metra kub, një shifër që pritet të mbetet e lartë në shkurt dhe muajin në vijim. Blloku ka sot një kapacitet pritës për të përpunuar 150 bcm LNG dhe synon të blejë 50 bcm vetëm këtë vit.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.