Blemë më pak grurë dhe paguam më shumë – Shifrat e doganave/ 2021-shi mban rekord për çmimin më të lartë
Gjatë vitit që kaloi vendi ynë importoi sasinë më ulët të grurit në 5 vitet e fundit dhe pagoi vlerën më të lartë. Sipas të dhënave të detajuara nga Drejtoria e Përgjithshme e Doganave, të siguruara nga TV SCAN, në 2021-shin u importuan afro 212 mijë ton grurë, me vlerë rreth 7 miliardë lekë. Po të vëmë re gjatë viteve të mëparshme janë importuar sasi më të larta, ku sasia më e madhe e blerë nga jashtë rezulton në vitin 2018, me rreth 251 mijë ton dhe me një vlerë prej afro 6.6 miliardë lekësh.
Nëse do të bëjmë një analizë të çmimeve të këtij produkti në import, vëmë re se gjatë vitit që lam pas kompanitë e importit dhe të prodhimit të miellit, kanë paguar më shtrenjtë për një kg grurë gjatë viti që lam pas, çka solli edhe rritjen e çmimit të bukës dhe nënprodukteve të tjera të grurit për konsumatorët. Kështu, në vitin 2021 një kilogram grurë është blerë 33.35 lekë/kg, nga 27.98 kg që u ble në vitin 2020.
Ajo që vihet re është se nga viti 2017 dhe në vazhdim, çmimi i grurit të sjellë në Shqipëri ka pësuar rritje progresive. Varësia e Shqipërisë nga importi është në masën 35% të konsumit dhe Rusia qëndron në vend të parë, e ndjekur nga Serbia, Franca dhe Ukraina. Ndërsa prodhimi vendas ka ardhur në rënie për shkak të kostove në rritje për fermerët dhe mungesës së politikave mbështetës, çka i bën konsumatorët të varur nga ndryshimi i çmimeve dhe politikave në tregjet ndërkombëtare. Për tregun e prodhimit miellit, u nis një hetim për Autoriteti i Konkurrencës për rritjen e çmimeve, i cili nuk është përfunduar ende.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.