Bllofi i të verbërit: Policia italiane kap mashtruesin që përfitonte para nga shteti duke udhëtuar me motor

Një italian, i cili dyshohet se ishte i verbër dhe merrte përfitime financiare prej vitesh, është kapur duke hipur në një motor të llojit skuter.

Policia tha se kishte arrestuar një të dyshuar 40-vjeçar në qytetin sicilian të Palermos me akuzën e mashtrimit të rëndë.

Burri akuzohet se ka marrë më shumë se 170,000 euro ndihmë shtetërore që nga viti 2008, pasi pretendoi se ishte “plotësisht i verbër” për shkak të një gjendjeje të lindur.

Policia financiare italiane u alarmua fillimisht pasi burri rinovoi lejen e drejtimit në 2018, pavarësisht nga dëmtimi i supozuar i shikimit.

Mediat vendase raportojnë se mashtruesi i dyshuar u kap teksa drejtonte makinën dhe njëkohësisht i dërgonte një mesazh në celularin e tij.

Ai u vu re gjithashtu duke vështruar në vitrinat e dyqaneve dhe duke i mësuar vajzës së tij të ngasë një biçikletë, sipas raporteve.

Ndonëse zotëronte një garazh, i dyshuari merrte edhe “të ardhurat bazë” mujore të paguara në Itali për qytetarët më të varfër.

Burri ishte i njohur për policinë dhe dyshohet se kishte qenë pjesë e një rrjeti kriminal që organizonte aksidente trafiku për të mbledhur paratë e sigurimit. Ai ishte dënuar me gati 15 vjet burg për mashtrimin në vitin 2020, por e ka apeluar dënimin.

40-vjeçari, banor i Palermos, është quajtur “Berlusconi” nga disa tabloidë italianë, një referencë për ish-kryeministrin e Italisë, i cili është përfshirë në vite të tëra çështjesh gjyqësore.

Policia tha se kishte sekuestruar gjithashtu një numër automjetesh dhe një magazinë si pjesë e operacionit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.